تعرفي على طريقة عمل بسكويت النشادر

2019-12-14 11:58:21
طريقة عمل بسكويت النشادر طريقة عمل بسكويت النشادر
  • الوجبه تكفي: 4 فرد/افراد
  • وقت الاعداد: 45 دقيقة/دقائق

بسكويت النشادر اشهر بسكويت بيتي من زمان، ويعتبر من الحلويات الاساسية في عيد الفطر، مناسب جدا للعزومات وللمناسبات، وكمان ممكن تعمليه للفطار مع الشاي، مقاديره سهلة وطريقة تنفيذه من اسهل ما يكون، وممكن تعمليه باللبن او بطعم البرتقال حسب اختيارك

المقادير

  • ٥٠٠ جرام زبده او سمنة بلدي
  • ٢٥٠ جرام سكر بودرة (سكر مطحون)
  • ٥ بيضات (بيض ابيض مش بلدي)
  • ١ ملعقة صغيرة فانيليا
  • ٢٥ جرام نشادر
  • كوب إلا ربع لبن دافي (مش مغلي) او نص كوب عصير برتقال (حسب الرغبة)
  • ٧٥٠ جرام دقيق
  • ١٠ جرام بيكينج بودر
  • ١ ملعقة صغيرة ملح

طريقة الاعداد

علشان نعمل بسكويت النشادر، هنحتاج العجان، هنضيف فيه السكر البودره (بعد ما تنخليه كويس) والزبده ونبدأ في الخفق على ابطئ سرعة لحد ما يحصل تجانس للعجين نزود سرعة العجان، لغاية ما يتحول العجين للون الابيض الكريمي، تبدأي تضيفي البيض بيضه بيضه مع الفانيليا والخفق شغال على ابطئ سرعة ولما يبدأ العجين في التجانس نزود السرعة شوية لحد ما تختلط كل المقادير.

نحط الملح والبيكينج بودر على الدقيق (مهم جدا تنخلي الدقيق قبل الاستخدام) ونخلطهم كويس، وبعدين نبدأ نضيفهم للعجين في العجان، والخفق شغال على السرعة البطيئة لحد ما تختلط كل المكونات مرة تانية، نضيف النشادر واللبن ونزود سرعة العجان لحد ما يتجانس العجين كله.

نسيب العجينة ترتاح ١٠ دقايق، وبعدين نبدأ نشكلها في صاج الفرن (ممكن تدهني الصاج زيت علشان البسكويت ميلزقش في الصاج، بس دهان بسيط بالفرشة)، استخدمي ماكينة البيتيفور او كيس الحلواني حسب رغبتك لتشكيل البسكويت في الصاج، ونفرش البسكويت في الصاج وتسيبي مسافة مناسبة بين كل قطة والتانية علشان هيحصل تمدد ليها في الفرن، وعلشان ميلزقوش في بعض.

نحط الصاج في الفرن على درجة حرارة ١٨٠ درجة، ونراعي اننا منفتحش الفرن الا بعد ما البسكويت ياخد اللون الذهبي المعروف، وبعدين نخرجه ونحطه في طبق التقديم .. والف هنا عليكي

هذه الوصفة من قسم:

فوائد بسكويت النشادر

البسكوت هو نوع من المعجنات مميز بطعمه ومذاقه ورائحته ومكوناته، وتلك المكونات هى سر فائدته، حيث يحتوى على اللبن والبيض وبشر الليمون أو البرتقال، التى تحتوى على عناصر غذائية هامة مثل فيتامين "سى"، والكالسيوم الموجود باللبن المفيد للعظام وغيرها من العناصر الغذائية الهامة

ضعي تعليق على الوصفة